GĦALIEX ?
Għaliex ħija lill-Kbir Alla
B’dak ilsienek toffendih?
Forsi ma tafx li int u jien
Nitħarrku u ngħixu fiH?
Għaliex tmaqdar lil min ħalqek?
Li f’idejh iżomm xortik
Li tant ħabbek, bagħat lil Ibnu
Sabiex b’demmu Hu jifdik!
Għaliex inti b’qalb ingrata
Tweġġa’ lill-Missier Qaddis?
Forsi tinsa kemm iħobbok
U għaliH kemm int għażiż.
Qatt ħsibt li kull nifs li tieħu
Hu tiegħu u mhux tiegħek?
Ma’ kull taħbita ta’ qalbek
Hu jimxi pass, pass miegħek.
Ieqaf ftit ħares madwarek
Miss b’idejk ir-risq u l-ġid
Illi għogbu jipprovdilek
Dak li Hu tal-ħajja s-Sid.
Għaliex tkasbar, ħabib tiegħi,
Isem Kristu tant sabiħ?
Possibbli m’għaraftx biżżejjed
Li jistħoqqlu l-ogħla ġieħ?
Għaliex tkasbar l-Ostja Mqaddsa
Ta’ Kristu l-Ġisem u d-Demm?
Ersaq duq il-benna Tiegħu
Hu jeħilsek minn kull hemm!
Għaliex ħija, lill-Madonna
Tant tweġġagħha b’dak il-fomm?
Waqt li Hi tgħożżok u tħobbok
Bl-imħabba ħelwa ta’ omm.
X’sejjer tirbaħ billi tidgħi?
Saħta fuqek biss iġġib
Fuq familtek, fuq pajjiżek,
Paċi f’qalbek m’intx se ssib.
Kun af żgur li meta tidgħi
Dan il-vizzju se jbaxxik
Tkun mistmerr mill-bniedem serju
U appoġġ żgur ħadd ma jtik.
Uża dak l-ilsien li silfek
Użah tajjab ma’ kulħadd
Bih agħmel il-ġid lill-għajrek
U lil Alla tkasbru qatt.
Anzi bierku, faħħru dejjem
Kull fejn tkun kabbru bis-sħiħ
Agħti xhieda ta’ tjubitu
B’fommok, b’qalbek ibq’għollieh!
Ftakar li s-siegħa għad tasal
Ma tafx meta u fi xħin
Li hemm fuq inti għad tidher
Quddiem l-Imħallef Divin.
Dur lejn Alla, itlob maħfra,
Umilja ruħek, la tibżax.
Tinsiex Kristu ċċekken qablek
Li jmut għalik ma beżax.
Ħares lejH fuq l-għuda msallab
U tibqax tiddisprezzah
Mur f’riġlejh fl-Ewkaristija
U tieqafx tirringrazzjah.
Erfa’ ħarstek lejn Marija
B’ilsienek iżjed tkasbarhiex.
Berikha, itlobha, ħobbha
U minn ħajtek twarrabhiex.
Maria Grima